raat-din kashmakash-e-zulf-e-duta mein hun main

rāt-din kashmakash-e-zulf-e-dutā meñ huuñ maiñ

haa.e kis pech meñ aafat meñ balā meñ huuñ maiñ

sub.h hote hī nikal chalne kā sāmān kiyā

raat bhar ke liye is kohna-sarā meñ huuñ maiñ

hosh aa.e haiñ buḌhāpe meñ javānī to ga.ī

sub.h kā vaqt hai aur yād-e-ḳhudā meñ huuñ maiñ

haa.e kis muñh se ho qismat ke bigaḌne kā gila

apne afa.āl-e-kamīna kī sazā meñ huuñ maiñ

bahut āsān thā ek ek ḳhatā kā karnā

sab kī ab fikr hai aur dast-e-qazā meñ huuñ maiñ

be-takalluf vahī kartā hai jo dil chāhe hai

fikr merī na karo tum fuqarā meñ huuñ maiñ

baat jo bas ga.ī dil meñ vo nikaltī kab hai

chheḌiye mujh ko na 'saifī' juhlā meñ huuñ maiñ

raat-din kashmakash-e-zulf-e-duta mein hun main

hae kis pech mein aafat mein bala mein hun main

subh hote hi nikal chalne ka saman kiya

raat bhar ke liye is kohna-sara mein hun main

hosh aae hain buDhape mein jawani to gai

subh ka waqt hai aur yaad-e-KHuda mein hun main

hae kis munh se ho qismat ke bigaDne ka gila

apne afaal-e-kamina ki saza mein hun main

bahut aasan tha ek ek KHata ka karna

sab ki ab fikr hai aur dast-e-qaza mein hun main

be-takalluf wahi karta hai jo dil chahe hai

fikr meri na karo tum fuqara mein hun main

baat jo bas gai dil mein wo nikalti kab hai

chheDiye mujh ko na 'saifi' juhla mein hun main