raat har moD pe phenke gae patthar kitne

raat har moḌ pe pheñke ga.e patthar kitne

be-qusūroñ ko lagī choT phaTe sar kitne

aaj is amn kī sā'at ko ġhanīmat samjho

kyā ḳhabar chamkeñge kal shahr meñ ḳhanjar kitne

kis qarīne se mirī jeb katar lete haiñ

un ke showcase meñ rakkhe hue paikar kitne

kabhī patjhaḌ kā samāñ hai to kabhī husn-e-bahār

uf na.e ruup badalte haiñ ye manzar kitne

tishnagī itne ġhazab kī hai ki bujhtī hī nahīñ

yuuñ to pī jaatā huuñ har roz samundar kitne

apne qadmoñ se jinheñ rauñdte phirte haiñ ham

unhīñ zarrāt meñ poshīda haiñ jauhar kitne

ai mire zehn kī chingārī tū kab bhaḌkegī

munjamid ho ga.e ehsās ke paikar kitne

fan kī gahrā.ī ko nāpoge bhalā kyā 'parvez'

is samundar meñ to Duube haiñ shanāvar kitne

raat har moD pe phenke gae patthar kitne

be-qusuron ko lagi choT phaTe sar kitne

aaj is amn ki sa'at ko ghanimat samjho

kya KHabar chamkenge kal shahr mein KHanjar kitne

kis qarine se meri jeb katar lete hain

un ke showcase mein rakkhe hue paikar kitne

kabhi patjhaD ka saman hai to kabhi husn-e-bahaar

uf nae rup badalte hain ye manzar kitne

tishnagi itne ghazab ki hai ki bujhti hi nahin

yun to pi jata hun har roz samundar kitne

apne qadmon se jinhen raundte phirte hain hum

unhin zarraat mein poshida hain jauhar kitne

ai mere zehn ki chingari tu kab bhaDkegi

munjamid ho gae ehsas ke paikar kitne

fan ki gahrai ko napoge bhala kya 'parwez'

is samundar mein to Dube hain shanawar kitne