raat hoti hai hasin chand jawan hota hai

raat hotī hai hasīñ chāñd javāñ hotā hai

phir bhī is dil pe koī bār-e-garāñ hotā hai

ab bhī yādoñ meñ tirā aks ayaañ hotā hai

jis tarah jhiil kā sahrā meñ gumāñ hotā hai

aaj bhī jalva-gah-e-sang-dilī hai duniyā

raqs to aaj bhī lāshoñ kā yahāñ hotā hai

dekh lo jhāñk ke in āñkhoñ meñ gar dekh sako

varna ye dard kahāñ lab se bayāñ hotā hai

maiñ chalā aaya magar ab bhī tirī mahfil meñ

kyā koī merī tarah tishna-dahāñ hotā hai

ab bhī ummīd hai duniyā to kabhī badlegī

ab bhī āñkhoñ meñ koī ḳhvāb nihāñ hotā hai

aks-e-fardā bhī dikhā detā hai ahl-e-dil ko

ashk-e-be-qadr jo āñkhoñ se ravāñ hotā hai

aa hī jaate haiñ tire vahshī pe vo bhī lamhe

jab tirā dard hī ik rāhat-e-jāñ hotā hai

aa.iye apne qadam aage baḌhā.eñ ki yahāñ

band muflis pe dar-e-pīr-e-muġhāñ hotā hai

terā dīvāna sukūñ paatā hai kyoñ kaun kahe

jab mohabbat kā koī marsiyāñ-ḳhvāñ hotā hai

log jab DhūñDte haiñ aish ke kuchh jalve 'nadīm'

apnī āñkhoñ meñ koī aur samāñ hotā hai

raat hoti hai hasin chand jawan hota hai

phir bhi is dil pe koi bar-e-garan hota hai

ab bhi yaadon mein tera aks ayan hota hai

jis tarah jhil ka sahra mein guman hota hai

aaj bhi jalwa-gah-e-sang-dili hai duniya

raqs to aaj bhi lashon ka yahan hota hai

dekh lo jhank ke in aankhon mein gar dekh sako

warna ye dard kahan lab se bayan hota hai

main chala aaya magar ab bhi teri mahfil mein

kya koi meri tarah tishna-dahan hota hai

ab bhi ummid hai duniya to kabhi badlegi

ab bhi aankhon mein koi KHwab nihan hota hai

aks-e-farda bhi dikha deta hai ahl-e-dil ko

ashk-e-be-qadr jo aankhon se rawan hota hai

aa hi jate hain tere wahshi pe wo bhi lamhe

jab tera dard hi ek rahat-e-jaan hota hai

aaiye apne qadam aage baDhaen ki yahan

band muflis pe dar-e-pir-e-mughan hota hai

tera diwana sukun pata hai kyon kaun kahe

jab mohabbat ka koi marsiyan-KHwan hota hai

log jab DhunDte hain aish ke kuchh jalwe 'nadim'

apni aankhon mein koi aur saman hota hai