raat ek be-tab jazbe ki tarah Dhalti rahi

raat ik be-tāb jazbe kī tarah Dhaltī rahī

thak ga.e the shoḳh manzar aur fazā thī so ga.ī

jugnū jugnū sī chamak hai aaj palkoñ par sajī

shorisheñ ehsās kī shāyad javāñ haiñ aaj bhī

irtikāz-e-fikr hai shāyad bhaTaktī āgahī

lamha lamha rūThtī jaa.e mirī āvārgī

gungunātī hai fazā sad-barg sī sad-rang sī

lamha lamha nāchtī hai fikr-o-fan kī tāzgī

ḳhalvatoñ kī guftugū meñ jalvatoñ ke ruup meñ

nikhrī nikhrī sī lage hai soch kī doshīzgī

qad mire taḳh.īl kā shāyad chhalāvā ban gayā

uryāñ uryāñ sī lage hai ḳhush-libāsī shauq kī

shoḳh sī mūrat ajantā kī khaḌī hai rū-ba-rū

marmarīñ añgḌā.iyoñ meñ jalva-gar hai shā.erī

phir dar-e-dil par hai shāyad ik ijāzat kī tarah

khoī khoī dastakoñ kī ik thakan ḳhāmosh sī

jhan jhanan sī ho rahī hai aaj phir man ke gagan

har-nafas āvāz detī hai masāfat duur kī

ye nigāhoñ kī nigāhoñ se nirālī guftugū

phir savāloñ kī javāboñ se huī hai dostī

maslahat to bil-yaqīñ kuchh ādatan majbūr hai

so ga.ī hai āḳhirash ab raat kī bhī tīrgī

dil ke andar mausam-e-sad-rang kī haiñ shorisheñ

be-karāñ hai raushnī bhī be-karāñ hai tīrgī

raat ek be-tab jazbe ki tarah Dhalti rahi

thak gae the shoKH manzar aur faza thi so gai

jugnu jugnu si chamak hai aaj palkon par saji

shorishen ehsas ki shayad jawan hain aaj bhi

irtikaz-e-fikr hai shayad bhaTakti aagahi

lamha lamha ruThti jae meri aawargi

gungunati hai faza sad-barg si sad-rang si

lamha lamha nachti hai fikr-o-fan ki tazgi

KHalwaton ki guftugu mein jalwaton ke rup mein

nikhri nikhri si lage hai soch ki doshizgi

qad mere taKHil ka shayad chhalawa ban gaya

uryan uryan si lage hai KHush-libasi shauq ki

shoKH si murat ajanta ki khaDi hai ru-ba-ru

marmarin angDaiyon mein jalwa-gar hai shaeri

phir dar-e-dil par hai shayad ek ijazat ki tarah

khoi khoi dastakon ki ek thakan KHamosh si

jhan jhanan si ho rahi hai aaj phir man ke gagan

har-nafas aawaz deti hai masafat dur ki

ye nigahon ki nigahon se nirali guftugu

phir sawalon ki jawabon se hui hai dosti

maslahat to bil-yaqin kuchh aadatan majbur hai

so gai hai aaKHirash ab raat ki bhi tirgi

dil ke andar mausam-e-sad-rang ki hain shorishen

be-karan hai raushni bhi be-karan hai tirgi