raat jab zaKHm ke aaine se Takraati hai

raat jab zaḳhm ke ā.īne se Takrātī hai

lau charāġhoñ kī shafaq ban ke bikhar jaatī hai

ghar kā āñgan ho ki sahrāoñ kā sannāTā ho

koī āvāz ta.āqub meñ chalī aatī hai

kitnā hassās hai ye ālam-e-tanhā.ī bhī

phuul khilte haiñ to zaḳhmoñ se mahak aatī hai

har na.ī sub.h tirī yaad kā aañsū ban kar

zindagī shaam kī palkoñ se Tapak jaatī hai

aag lagtī hai ḳhayāloñ ke ufuq-zāroñ meñ

raushnī mom kī mānind pighal jaatī hai

dil kī galiyoñ se guzartā hai zamāna koī

fikr-e-shā.ir meñ koī raat mahak jaatī hai

sochte chehroñ pe sadiyoñ kī thakan hai 'sāqib'

jāgtī āñkhoñ meñ ab niiñd kahāñ aatī hai

raat jab zaKHm ke aaine se Takraati hai

lau charaghon ki shafaq ban ke bikhar jati hai

ghar ka aangan ho ki sahraon ka sannaTa ho

koi aawaz taaqub mein chali aati hai

kitna hassas hai ye aalam-e-tanhai bhi

phul khilte hain to zaKHmon se mahak aati hai

har nai subh teri yaad ka aansu ban kar

zindagi sham ki palkon se Tapak jati hai

aag lagti hai KHayalon ke ufuq-zaron mein

raushni mom ki manind pighal jati hai

dil ki galiyon se guzarta hai zamana koi

fikr-e-shair mein koi raat mahak jati hai

sochte chehron pe sadiyon ki thakan hai 'saqib'

jagti aankhon mein ab nind kahan aati hai