raat ka ab koi jadu nahin chalne wala

raat kā ab koī jaadū nahīñ chalne vaalā

ik sitārā hai use din meñ badalne vaalā

dushmanī laakh nibhāte raheñ kaale bādal

shaam se pahle ye sūraj nahīñ Dhalne vaalā

hañsne vaale diye ḳhāmosh na hoñge jab tak

ghar pe Thahrā huā tūfāñ nahīñ Talne vaalā

apne pītal pe chaḌhāte raho sone ke varaq

dil kī duniyā meñ ye sikka nahīñ chalne vaalā

vo mujhe dekh ke phunkār rahā hai aise

azhdahā jaise kisī ko ho nigalne vaalā

ātish-e-ishq hai ye khel na samjhe koī

ḳhaak ho jaatā hai is aag meñ jalne vaalā

chāhe sailāb-e-balā gher le aakar mujh ko

mere bhaa.ī kā nahīñ ḳhuun ubalne vaalā

itnā kamzor bhī samjhe na koī mujh ko 'fahīm'

ġham ke dariyā se ye kāġhaz nahīñ galne vaalā

raat ka ab koi jadu nahin chalne wala

ek sitara hai use din mein badalne wala

dushmani lakh nibhate rahen kale baadal

sham se pahle ye suraj nahin Dhalne wala

hansne wale diye KHamosh na honge jab tak

ghar pe Thahra hua tufan nahin Talne wala

apne pital pe chaDhate raho sone ke waraq

dil ki duniya mein ye sikka nahin chalne wala

wo mujhe dekh ke phunkar raha hai aise

azhdaha jaise kisi ko ho nigalne wala

aatish-e-ishq hai ye khel na samjhe koi

KHak ho jata hai is aag mein jalne wala

chahe sailab-e-bala gher le aakar mujh ko

mere bhai ka nahin KHun ubalne wala

itna kamzor bhi samjhe na koi mujh ko 'fahim'

gham ke dariya se ye kaghaz nahin galne wala