raat ka kya zikr hai sham-o-sahar aaya nahin

raat kā kyā zikr hai shām-o-sahar aayā nahīñ

kaun sā ilzām hai jo mere sar aayā nahīñ

yuuñ to rāh-e-be-ḳhatar meñ rahnumā milte rahe

pur-ḳhatar rāhoñ meñ koī rāhbar aayā nahīñ

kaun jaane kis ke Dar se aaj phir merā rafīq

chāhtā thā mere ghar aanā magar aayā nahīñ

is qadar qurbat baḌhī har naqsh dhuñdlā ho gayā

vo thā mere sāmne lekin nazar aayā nahīñ

dil ko kyā kahiye ki vo qātil ke ghar ḳhud hī gayā

laakh koshish kī magar vo raah par aayā nahīñ

laakh andeshoñ ne 'anvar' gher rakkhā hai mujhe

raat sar par aa ga.ī aur nāma-bar aayā nahīñ

raat ka kya zikr hai sham-o-sahar aaya nahin

kaun sa ilzam hai jo mere sar aaya nahin

yun to rah-e-be-KHatar mein rahnuma milte rahe

pur-KHatar rahon mein koi rahbar aaya nahin

kaun jaane kis ke Dar se aaj phir mera rafiq

chahta tha mere ghar aana magar aaya nahin

is qadar qurbat baDhi har naqsh dhundla ho gaya

wo tha mere samne lekin nazar aaya nahin

dil ko kya kahiye ki wo qatil ke ghar KHud hi gaya

lakh koshish ki magar wo rah par aaya nahin

lakh andeshon ne 'anwar' gher rakkha hai mujhe

raat sar par aa gai aur nama-bar aaya nahin