raat ka tarik-tar patthar jigar pani karen

raat kā tārīk-tar patthar jigar paanī kareñ

ham bhalā kis ke liye ye kār-e-lā-sānī kareñ

din to din rātoñ ko bhī ye apnī man-mānī kareñ

mamlikat par dil kī yādeñ jaise sultānī kareñ

bas ga.e haiñ aañkh meñ manzar pas-e-manzar sarāb

ham kahāñ tak apne ḳhvāboñ kī nigahbānī kareñ

ik tilismī rañg meñ kho jaa.eñ jab chehre tamām

farz hai āñkhoñ pe kyā iz.hār-e-hairānī kareñ

ab to saare faisle haiñ sañg-dil rātoñ ke haath

ye agar chāheñ to phir ḳhvāboñ kī arzānī kareñ

jab udaas āñkheñ diloñ se guftugū karne lageñ

phir to lab bekār hī zikr-e-pashemānī kareñ

raat ka tarik-tar patthar jigar pani karen

hum bhala kis ke liye ye kar-e-la-sani karen

din to din raaton ko bhi ye apni man-mani karen

mamlikat par dil ki yaaden jaise sultani karen

bas gae hain aankh mein manzar pas-e-manzar sarab

hum kahan tak apne KHwabon ki nigahbani karen

ek tilismi rang mein kho jaen jab chehre tamam

farz hai aankhon pe kya izhaar-e-hairani karen

ab to sare faisle hain sang-dil raaton ke hath

ye agar chahen to phir KHwabon ki arzani karen

jab udas aankhen dilon se guftugu karne lagen

phir to lab bekar hi zikr-e-pashemani karen