raat ke sath hi jab dard jawan hota hai

raat ke saath hī jab dard javāñ hotā hai

mere zaḳhmoñ se nayā shams ayaañ hotā hai

raqs kartā hai sar-e-shām mirī āñkhoñ meñ

ek chehra jo mire dil meñ nihāñ hotā hai

lab ke inkār ko inkār na samjhā jaa.e

raaz ulfat kā nigāhoñ se bayāñ hotā hai

karvaTeñ khīñchtī haiñ silvaToñ meñ tasvīreñ

saath ik ishq ke kyā ḳhuub samāñ hotā hai

ḳhuun ugaltī hai mirī rūh-e-vafā kī dhaḌkan

merī nas nas meñ tirā ishq ravāñ hotā hai

vaqt ke saath jo har gaam badal jaate haiñ

un kā duniyā meñ kahāñ nām-o-nishāñ hotā hai

ham-navā ham-nashīñ ham-rāh bhī jo ho 'rinkī'

ek hī shaḳhs meñ ye jaadū kahāñ hotā hai

raat ke sath hi jab dard jawan hota hai

mere zaKHmon se naya shams ayan hota hai

raqs karta hai sar-e-sham meri aankhon mein

ek chehra jo mere dil mein nihan hota hai

lab ke inkar ko inkar na samjha jae

raaz ulfat ka nigahon se bayan hota hai

karwaTen khinchti hain silwaTon mein taswiren

sath ek ishq ke kya KHub saman hota hai

KHun ugalti hai meri ruh-e-wafa ki dhaDkan

meri nas nas mein tera ishq rawan hota hai

waqt ke sath jo har gam badal jate hain

un ka duniya mein kahan nam-o-nishan hota hai

ham-nawa ham-nashin ham-rah bhi jo ho 'rinki'

ek hi shaKHs mein ye jadu kahan hota hai