raat khaDi hai sar pe sunahre diyon ka thaal liye

raat khaḌī hai sar pe sunahre diyoñ kā thaal liye

ai man tū bhī umr batā de naqsh-e-ḳhayāl liye

lamhe ye be-rañg patañge kab aate haiñ haath

saarā saarā din phirtā hai sūraj jaal liye

phul-jhaḌiyāñ sī chhūT rahī haiñ shaam ke dāman meñ

kaun khaḌā hai nārañgī sā chehra laal liye

aaj samajh meñ aayā apnī āñkhoñ kā mafhūm

har insān hai sūrat par do zaḳhm-e-malāl liye

ujlī chāñdnī raat sī āñkheñ ujlā dhuup sā mukh

haa.e re vo hirnī sī laḌkī shauq-e-visāl liye

ghar vāloñ se toḌ ke naatā kis ne paayā mujh ko

kahāñ phiroge shā.ir sāhab dast-e-savāl liye

gulzāroñ meñ basne vaale bhakkar des bhī dekh

thal kā registān bhī hai gudḌī meñ la.al liye

aaj talak us aurat se aatā hai ḳhauf 'ḳhalīl'

ghar meñ ik din ghus aa.ī thī bikhre baal liye

raat khaDi hai sar pe sunahre diyon ka thaal liye

ai man tu bhi umr bata de naqsh-e-KHayal liye

lamhe ye be-rang patange kab aate hain hath

sara sara din phirta hai suraj jal liye

phul-jhaDiyan si chhuT rahi hain sham ke daman mein

kaun khaDa hai narangi sa chehra lal liye

aaj samajh mein aaya apni aankhon ka mafhum

har insan hai surat par do zaKHm-e-malal liye

ujli chandni raat si aankhen ujla dhup sa mukh

hae re wo hirni si laDki shauq-e-visal liye

ghar walon se toD ke nata kis ne paya mujh ko

kahan phiroge shair sahab dast-e-sawal liye

gulzaron mein basne wale bhakkar des bhi dekh

thal ka registan bhi hai gudDi mein lal liye

aaj talak us aurat se aata hai KHauf 'KHalil'

ghar mein ek din ghus aai thi bikhre baal liye