raat khole rahi khiDkiyan der tak

raat khole rahī khiḌkiyāñ der tak

chāñd kartā rahā shoḳhiyāñ der tak

kal samundar se sūraj kī bāteñ huiiñ

phir barastī rahīñ badliyāñ der tak

laḌkiyoñ titliyoñ meñ yahī farq hai

gul pe ruktī nahīñ titliyāñ der tak

ye bhī socho ki dariyā se ho kar judā

jī hī saktī nahīñ machhliyāñ der tak

bādaloñ ne pahāḌī qasīda paḌhā

gungunātī rahīñ vādiyāñ der tak

jab daraḳhtoñ pe mausam ke phal aa ga.e

bojh sahtī rahīñ Dāliyāñ der tak

chaḌhte sūraj ko ik din zavāl aa.egā

sab kī hotī nahīñ dilliyāñ der tak

ek qaidī jo baazū kī barrack meñ thā

us kī bajtī rahīñ beḌiyāñ der tak

jeb kī vus'atoñ se jo bāhar huiiñ

bhuuk taktī rahī roTiyāñ der tak

raat khole rahi khiDkiyan der tak

chand karta raha shoKHiyan der tak

kal samundar se suraj ki baaten huin

phir barasti rahin badliyan der tak

laDkiyon titliyon mein yahi farq hai

gul pe rukti nahin titliyan der tak

ye bhi socho ki dariya se ho kar juda

ji hi sakti nahin machhliyan der tak

baadalon ne pahaDi qasida paDha

gungunati rahin wadiyan der tak

jab daraKHton pe mausam ke phal aa gae

bojh sahti rahin Daliyan der tak

chaDhte suraj ko ek din zawal aaega

sab ki hoti nahin dilliyan der tak

ek qaidi jo bazu ki barrack mein tha

us ki bajti rahin beDiyan der tak

jeb ki wus'aton se jo bahar huin

bhuk takti rahi roTiyan der tak