raat ki bhigi palkon par jab ashk hamare hanste hain

raat kī bhīgī palkoñ par jab ashk hamāre hañste haiñ

sannāToñ ke saañp diloñ kī tanhā.ī ko Daste haiñ

kal tak mai-ḳhāne meñ jin ke naam kā sikka chaltā thā

qatra qatra mai kī ḳhātir aaj vo log taraste haiñ

ai mere majrūh tabassum rūp-nagar kī riit na pūchh

jin ke sīnoñ meñ patthar haiñ un par phuul baraste haiñ

shahr-e-havas ke saudā.ī ḳhud jin kī rūheñ nañgī haiñ

mere tan kī uryānī par āvāze kyuuñ kaste haiñ

chhīn sakegā kaun sabā se lams hamārī sāñsoñ kā

ham phūloñ kī ḳhushbū ban kar gulzāroñ meñ baste haiñ

ashkoñ kī qīmat kyā jāneñ pyaar ke jhūTe saudāgar

in sayyāl nagīnoñ se to hiire motī saste haiñ

kaun aa.egā nañge pairoñ sham.a jalā kar shaam Dhale

'prem' mohabbat kī manzil ke baḌe bhayānak raste haiñ

raat ki bhigi palkon par jab ashk hamare hanste hain

sannaTon ke sanp dilon ki tanhai ko Daste hain

kal tak mai-KHane mein jin ke nam ka sikka chalta tha

qatra qatra mai ki KHatir aaj wo log taraste hain

ai mere majruh tabassum rup-nagar ki rit na puchh

jin ke sinon mein patthar hain un par phul baraste hain

shahr-e-hawas ke saudai KHud jin ki ruhen nangi hain

mere tan ki uryani par aawaze kyun kaste hain

chhin sakega kaun saba se lams hamari sanson ka

hum phulon ki KHushbu ban kar gulzaron mein baste hain

ashkon ki qimat kya jaanen pyar ke jhuTe saudagar

in sayyal naginon se to hire moti saste hain

kaun aaega nange pairon shama jala kar sham Dhale

'prem' mohabbat ki manzil ke baDe bhayanak raste hain