raat ki ninden to pahle hi uDa kar le gaya

raat kī nīñdeñ to pahle hī uḌā kar le gayā

rah ga.ī thī aarzū so vo bhī aa kar le gayā

din nikalte hī vo ḳhvāboñ ke jazīre kyā hue

sub.h kā sūraj mirī āñkheñ churā kar le gayā

duur se dekho to ye dariyā hai paanī kī lakīr

mauj meñ aayā to jangal bhī bahā kar le gayā

us ne to in motiyoñ par ḳhaak bhī Daalī nahīñ

aañkh kī thālī meñ dil aañsū sajā kar le gayā

ġhaur se dekhā to dil kī ḳhaak tak baaqī na thī

mujh ko dā'vā thā ki maiñ sab kuchh bachā kar le gayā

raat ki ninden to pahle hi uDa kar le gaya

rah gai thi aarzu so wo bhi aa kar le gaya

din nikalte hi wo KHwabon ke jazire kya hue

subh ka suraj meri aankhen chura kar le gaya

dur se dekho to ye dariya hai pani ki lakir

mauj mein aaya to jangal bhi baha kar le gaya

us ne to in motiyon par KHak bhi Dali nahin

aankh ki thaali mein dil aansu saja kar le gaya

ghaur se dekha to dil ki KHak tak baqi na thi

mujh ko da'wa tha ki main sab kuchh bacha kar le gaya