raat kitni raushan hai kuchh likha-paDhi kar len aao phir ghazal kah len

raat kitnī raushan hai kuchh likhā-paḌhī kar leñ aao phir ġhazal kah leñ

chāñdnī ke manzar meñ do ghaḌī zarā dahkeñ aao phir ġhazal kah leñ

in añdherī rātoñ ke ḳhaufnāk sāyoñ se bach ke sub.h tak jī leñ

zahr dhuup kā chakh kar maut ko ziyā baḳhsheñ aao phir ġhazal kah leñ

vo ki ek chehra hai yā kitāb yā dariyā yā koī samundar hai

nīm-bāz āñkhoñ meñ us kī jhāñk kar dekheñ aao phir ġhazal kah leñ

chāñdnī kā ras piine duur tak nikal jaa.eñ bhuul jaa.eñ duniyā ko

khurdurī sī saḌkoñ par der tak yūñhī ghūmeñ aao phir ġhazal kah leñ

jāñ-nashīñ se dushman tak saare rishte nātoñ ko pheñk deñ samundar meñ

lahr lahr bedārī kī hasīñ ridā oḌheñ aao phir ġhazal kah leñ

dardnāk chehroñ par muskurāhaTeñ oḌhe ḳhud ko jā-ba-jā becheñ

ham 'tapish' tumheñ guzrā vaqt maan kar socheñ aao phir ġhazal kah leñ

raat kitni raushan hai kuchh likha-paDhi kar len aao phir ghazal kah len

chandni ke manzar mein do ghaDi zara dahken aao phir ghazal kah len

in andheri raaton ke KHaufnak sayon se bach ke subh tak ji len

zahr dhup ka chakh kar maut ko ziya baKHshen aao phir ghazal kah len

wo ki ek chehra hai ya kitab ya dariya ya koi samundar hai

nim-baz aankhon mein us ki jhank kar dekhen aao phir ghazal kah len

chandni ka ras pine dur tak nikal jaen bhul jaen duniya ko

khurduri si saDkon par der tak yunhi ghumen aao phir ghazal kah len

jaan-nashin se dushman tak sare rishte naton ko phenk den samundar mein

lahr lahr bedari ki hasin rida oDhen aao phir ghazal kah len

dardnak chehron par muskurahaTen oDhe KHud ko ja-ba-ja bechen

hum 'tapish' tumhein guzra waqt man kar sochen aao phir ghazal kah len