raat ko KHwab ho gai din ko KHayal ho gai

raat ko ḳhvāb ho ga.ī din ko ḳhayāl ho ga.ī

apne liye to zindagī ek savāl ho ga.ī

Daal ke ḳhaak chaak par chal diyā aaise kūza-gar

jaise numūd-e-ḳhushk-o-tar rū-ba-zavāl ho ga.ī

phuul ne phuul ko chhuā jashn-e-visāl to huā

ya.anī koī nibāh kī rasm bahāl ho ga.ī

tujh ko kahāñ se khojtā jism zamīñ pe bojh thā

āḳhir isī takān se ruuh niDhāl ho ga.ī

kaun thā aisā ham-safar kaun bichhaḌ gayā 'zafar'

mauj-e-nashāt-e-rahguzar vaqf-e-malāl ho ga.ī

raat ko KHwab ho gai din ko KHayal ho gai

apne liye to zindagi ek sawal ho gai

Dal ke KHak chaak par chal diya aaise kuza-gar

jaise numud-e-KHushk-o-tar ru-ba-zawal ho gai

phul ne phul ko chhua jashn-e-visal to hua

yani koi nibah ki rasm bahaal ho gai

tujh ko kahan se khojta jism zamin pe bojh tha

aaKHir isi takan se ruh niDhaal ho gai

kaun tha aisa ham-safar kaun bichhaD gaya 'zafar'

mauj-e-nashat-e-rahguzar waqf-e-malal ho gai