raat nikla hi tha mahtab to tu yaad aaya

raat niklā hī thā mahtāb to tū yaad aaya

had se jab dil huā betāb to tū yaad aaya

sochtā thā ki tujhe dil se bhulā duuñ lekin

bhūlne ke hue asbāb to tū yaad aaya

zo'm mujh ko thā maiñ us paar pahuñch jā.ūñgā

merī kashtī huī ġharqāb to tū yaad aaya

aish aur kaif ke lamhoñ meñ bhulāyā thā tujhe

ġham kā baḌhne lagā sailāb to tū yaad aaya

shaam se rote hue shaam paḌī āñgan meñ

shal hue jab mire a.asāb to tū yaad aaya

mere hālāt hī baa.is the magar ai jānāñ

chhoḌ kar jab ga.e ahbāb to tū yaad aaya

rat-jage ban ga.e haiñ merā muqaddar 'shāhid'

ḳhvāb hone lage nāyāb to tū yaad aaya

raat nikla hi tha mahtab to tu yaad aaya

had se jab dil hua betab to tu yaad aaya

sochta tha ki tujhe dil se bhula dun lekin

bhulne ke hue asbab to tu yaad aaya

zo'm mujh ko tha main us par pahunch jaunga

meri kashti hui gharqab to tu yaad aaya

aish aur kaif ke lamhon mein bhulaya tha tujhe

gham ka baDhne laga sailab to tu yaad aaya

sham se rote hue sham paDi aangan mein

shal hue jab mere aasab to tu yaad aaya

mere haalat hi bais the magar ai jaanan

chhoD kar jab gae ahbab to tu yaad aaya

rat-jage ban gae hain mera muqaddar 'shahid'

KHwab hone lage nayab to tu yaad aaya