raat se jab din ka sauda ho gaya

raat se jab din kā saudā ho gayā

raushnī kā ḳhuun ThanDā ho gayā

daar par jin kā baserā ho gayā

un kī qismat meñ ujālā ho gayā

jab se terā ġham gavārā ho gayā

vāqa'ī tū hī masīhā ho gayā

tujh ko pā kar dil kalīsā ho gayā

aur fanā hote hī kā'ba ho gayā

āshiyāñ bante hī rusvā ho gayā

kyā kahūñ kyā kyā tamāshā ho gayā

tīrgī kā bol-bālā ho gayā

yā'nī paanī sar se ūñchā ho gayā

dhuup hī meñ saaya mere saath thā

chhāoñ pā kar be-sahārā ho gayā

dekhiye be-iltifātī kā asar

mere dil kā zaḳhm gahrā ho gayā

dil kā parda chaak hote hī 'adīb'

mere siine meñ ujālā ho gayā

raat se jab din ka sauda ho gaya

raushni ka KHun ThanDa ho gaya

dar par jin ka basera ho gaya

un ki qismat mein ujala ho gaya

jab se tera gham gawara ho gaya

waqa'i tu hi masiha ho gaya

tujh ko pa kar dil kalisa ho gaya

aur fana hote hi ka'ba ho gaya

aashiyan bante hi ruswa ho gaya

kya kahun kya kya tamasha ho gaya

tirgi ka bol-baala ho gaya

ya'ni pani sar se uncha ho gaya

dhup hi mein saya mere sath tha

chhaon pa kar be-sahaara ho gaya

dekhiye be-iltifati ka asar

mere dil ka zaKHm gahra ho gaya

dil ka parda chaak hote hi 'adib'

mere sine mein ujala ho gaya