raat to shauq se sunti hai kahani meri

raat to shauq se suntī hai kahānī merī

din kahāñ suntā hai āshufta-bayānī merī

dil to kahtā hai ki maiñ kartī rahūñ sair-e-jahāñ

roz hotī hī rahe naql-e-makānī merī

ab to ḳhair aur bhī haiñ chāhne vaale lekin

maañ kī ulfat hai magar sab se purānī merī

laaj rakkhī hai duāoñ kī mire mālik ne

us ne jab dekhī hai ashkoñ kī ravānī merī

ma.anavī bhī hai haqīqī bhī hai merī aulād

baaqī rah jā.egī duniyā meñ nishānī merī

ashk-e-ġham piite hue maiñ ne guzārīñ rāteñ

is bulandī pe hai ab tishna-dahānī merī

itnā masrūf rakhā hai mire mālik ne mujhe

maiñ sunā.ūñ to bhalā kaise kahānī merī

usī college kī fazāoñ ne bulāyā hai mujhe

jis meñ paḌhte hue guzrī hai javānī merī

giit us ke hī sunātā hai sadā vo 'rāhat'

dil ne mere to kabhī baat na maanī merī

raat to shauq se sunti hai kahani meri

din kahan sunta hai aashufta-bayani meri

dil to kahta hai ki main karti rahun sair-e-jahan

roz hoti hi rahe naql-e-makani meri

ab to KHair aur bhi hain chahne wale lekin

man ki ulfat hai magar sab se purani meri

laj rakkhi hai duaon ki mere malik ne

us ne jab dekhi hai ashkon ki rawani meri

manawi bhi hai haqiqi bhi hai meri aulad

baqi rah jaegi duniya mein nishani meri

ashk-e-gham pite hue main ne guzarin raaten

is bulandi pe hai ab tishna-dahani meri

itna masruf rakha hai mere malik ne mujhe

main sunaun to bhala kaise kahani meri

usi college ki fazaon ne bulaya hai mujhe

jis mein paDhte hue guzri hai jawani meri

git us ke hi sunata hai sada wo 'rahat'

dil ne mere to kabhi baat na mani meri