raat yaadon ki barkha barasti rahi dhyan bichhDe zamanon ka aata raha

raat yādoñ kī barkhā barastī rahī dhyān bichhḌe zamānoñ kā aatā rahā

aañkh meñ raakh biite dinoñ kī liye maiñ ga.e mausamoñ ko bulātā rahā

shahr se dasht meñ dasht se shahr meñ lahr sī ik milātā huā lahr meñ

maiñ sar-e-shahr-e-jāñ raqs kartā rahā maiñ sar-e-dasht-e-dil ḳhaak uḌātā rahā

aañkh meñ dar khulā thā tilismāt kā bhed khultā na thā par kisī baat kā

aa.ina sā dikhātī rahīñ hairateñ koī parde uThātā girātā rahā

raat kī oḌhnī ke sitāre bujhe bujhne vaale jo the diip saare bujhe

dard ke chāñd kī chāñdnī meñ magar shahr-e-jāñ raat bhar jagmagātā rahā

kuchh ḳhayāloñ kā ḳhvāboñ kā maiñ naqsh-gar aur to kuchh na thā paas apne magar

kuchh ḳhayāl aañkh meñ sūrat-e-ḳhvāb the naqsh kyā kyā unhī se banātā rahā

raat yaadon ki barkha barasti rahi dhyan bichhDe zamanon ka aata raha

aankh mein rakh bite dinon ki liye main gae mausamon ko bulata raha

shahr se dasht mein dasht se shahr mein lahr si ek milata hua lahr mein

main sar-e-shahr-e-jaan raqs karta raha main sar-e-dasht-e-dil KHak uData raha

aankh mein dar khula tha tilismat ka bhed khulta na tha par kisi baat ka

aaina sa dikhati rahin hairaten koi parde uThata giraata raha

raat ki oDhni ke sitare bujhe bujhne wale jo the dip sare bujhe

dard ke chand ki chandni mein magar shahr-e-jaan raat bhar jagmagata raha

kuchh KHayalon ka KHwabon ka main naqsh-gar aur to kuchh na tha pas apne magar

kuchh KHayal aankh mein surat-e-KHwab the naqsh kya kya unhi se banata raha