raaten wo dil-fareb bahaaren wo KHwab ki

rāteñ vo dil-fareb bahāreñ vo ḳhvāb kī

piirī meñ yaad aa.ī haiñ bāteñ shabāb kī

rindoñ kī bazm aur burā.ī sharāb kī

vaa.iz ne apnī aap hī miTTī ḳharāb kī

yuuñ dhajjiyāñ uḌā.īñ nazar ne naqāb kī

tanvīr chhan rahī hai ruḳh-e-pur-hijāb kī

shabnam dikhā rahī hai jhalak inqalāb kī

maujeñ sunā rahī haiñ kahānī habāb kī

ġhunchoñ ko gudgudā ke jagāyā nasīm ne

phūloñ se kheltī hai kiran āftāb kī

pīr-e-muġhāñ ke zarf pe harf aa rahā hai aaj

ḳhālī dikhā rahā hai surāhī shabāb kī

dil kā lagāo dil se nazar kā nazar se hai

hājat savāl kī na zarūrat javāb kī

apnā tarīq 'zabt' zamāne se hai judā

fikr-e-azāb hai na tamanna savāb kī

raaten wo dil-fareb bahaaren wo KHwab ki

piri mein yaad aai hain baaten shabab ki

rindon ki bazm aur burai sharab ki

waiz ne apni aap hi miTTi KHarab ki

yun dhajjiyan uDain nazar ne naqab ki

tanwir chhan rahi hai ruKH-e-pur-hijab ki

shabnam dikha rahi hai jhalak inqalab ki

maujen suna rahi hain kahani habab ki

ghunchon ko gudguda ke jagaya nasim ne

phulon se khelti hai kiran aaftab ki

pir-e-mughan ke zarf pe harf aa raha hai aaj

KHali dikha raha hai surahi shabab ki

dil ka lagao dil se nazar ka nazar se hai

hajat sawal ki na zarurat jawab ki

apna tariq 'zabt' zamane se hai juda

fikr-e-azab hai na tamanna sawab ki