raaz-e-chashm-e-mai-gun hai kaif-e-muddaa mera

rāz-e-chashm-e-mai-gūñ hai kaif-e-mudda.ā merā

ġhair kī nazar se hai duur mai-kadā merā

vāste kī ḳhūbī ne sahl manzileñ kar diiñ

husn ishq kā rahbar ishq rahnumā merā

kar diyā mujhe be-ḳhud un kī be-niyāzī ne

kah rahā huuñ ḳhud un se dil sambhālnā merā

haa.e ḳhauf-e-badnāmī vaa.e fikr-e-nākāmī

bevafā ke hāthoñ meñ hāsil-e-vafā merā

lutf-e-ḳhalvat-o-jalvat ham na pā sake lekin

dhuum har taraf un kī zikr jā-ba-jā merā

tarz-e-vālihāna kī daad kab milī mujh ko

nāz-e-dost kab niklā sūrat-āshnā merā

sochne lagegī kuchh terī ḳhush-nigāhī bhī

rā.egāñ na jā.egā yuuñ hī dekhnā merā

maiñ ne jab kabhī dekhā sar jhukā liyā tū ne

tū ne jab kabhī dekhā dil taḌap gayā merā

ishrat-e-hijāb az-ḳhud chārasāz-e-dil kyā ho

saaz ho jab ai zālim soz-āshnā merā

merī ḳhasta-hālī ne sa.ī-e-ḳhud-shanāsī kī

un kī ḳhud-numā.ī ne jab kiyā gila merā

hai jo hazrat-e-'manzūr' e'tibār-e-īñ-o-āñ

izn-e-be-ḳhudī le kar pūchhiye patā merā

raaz-e-chashm-e-mai-gun hai kaif-e-muddaa mera

ghair ki nazar se hai dur mai-kada mera

waste ki KHubi ne sahl manzilen kar din

husn ishq ka rahbar ishq rahnuma mera

kar diya mujhe be-KHud un ki be-niyazi ne

kah raha hun KHud un se dil sambhaalna mera

hae KHauf-e-badnami wae fikr-e-nakaami

bewafa ke hathon mein hasil-e-wafa mera

lutf-e-KHalwat-o-jalwat hum na pa sake lekin

dhum har taraf un ki zikr ja-ba-ja mera

tarz-e-walihana ki dad kab mili mujh ko

naz-e-dost kab nikla surat-ashna mera

sochne lagegi kuchh teri KHush-nigahi bhi

raegan na jaega yun hi dekhna mera

main ne jab kabhi dekha sar jhuka liya tu ne

tu ne jab kabhi dekha dil taDap gaya mera

ishrat-e-hijab az-KHud chaarasaz-e-dil kya ho

saz ho jab ai zalim soz-ashna mera

meri KHasta-haali ne sai-e-KHud-shanasi ki

un ki KHud-numai ne jab kiya gila mera

hai jo hazrat-e-'manzur' e'tibar-e-in-o-an

izn-e-be-KHudi le kar puchhiye pata mera