raaz-e-fitrat se ayan ho koi manzar koi dhun

rāz-e-fitrat se ayaañ ho koī manzar koī dhun

sāz-e-hastī se bhī nikle koī paikar koī dhun

maiñ vo āvāz jo ab tak hai samā.at se pare

maiñ vo naġhma abhī utrī nahīñ jis par koī dhun

ik ġhazal chheḌ ke rotā rahā mujh meñ koī

ik samāñ bāñdh ke hañstī rahī mujh par koī dhun

ūñghne lagtī hai jab paañv ke chhāloñ kī tapak

chheḌ dete haiñ mirī raah ke patthar koī dhun

aql farmān sunātī rahī TuuTā na jumūd

raqs-e-vahshat kā taqāzā thā mukarrar koī dhan

vaqt kī lai se ham-āhañg jo hotā huuñ nadīm

bain kartī hai kahīñ ruuh ke andar koī dhun

raaz-e-fitrat se ayan ho koi manzar koi dhun

saz-e-hasti se bhi nikle koi paikar koi dhun

main wo aawaz jo ab tak hai samaat se pare

main wo naghma abhi utri nahin jis par koi dhun

ek ghazal chheD ke rota raha mujh mein koi

ek saman bandh ke hansti rahi mujh par koi dhun

unghne lagti hai jab panw ke chhaalon ki tapak

chheD dete hain meri rah ke patthar koi dhun

aql farman sunati rahi TuTa na jumud

raqs-e-wahshat ka taqaza tha mukarrar koi dhan

waqt ki lai se ham-ahang jo hota hun nadim

bain karti hai kahin ruh ke andar koi dhun