raaz-e-nihan thi zindagi raaz-e-nihan hai aaj bhi

rāz-e-nihāñ thī zindagī rāz-e-nihāñ hai aaj bhī

vahm-o-gumāñ meñ thī vahm-o-gumāñ hai aaj bhī

kal bhī navā-e-āgahī qīmat-e-sañg-o-ḳhisht thī

naġhma-e-amn-o-āshtī jins-e-girāñ hai aaj bhī

dil se to roz-o-shab huī laakh tarah kī guftugū

tishna-e-guftugū magar apnī zabāñ hai aaj bhī

ḳhaak meñ jazb ho gayā tere shahīd kā lahū

matla-e-kā.enāt par surḳh dhuāñ hai aaj bhī

ishq ko niiñd aa ga.ī vaqt pe os paḌ ga.ī

apne junūñ ke dasht meñ dhuup javāñ hai aaj bhī

vaqt kī dastaras nahīñ bazm-e-gah-e-ḳhayāl tak

ruḳh pe ġhubār hī sahī yaad javāñ hai aaj bhī

kal bhī ruḳh-e-hayāt par rañg-e-shaguftagī na thā

sub.h-e-bahār-e-zindagī shām-e-ḳhizāñ hai aaj bhī

kal bhī zabān-o-nutq ko ḳhauf-e-sinān-e-saif thā

naqd-o-nazar ko dahshat-e-tīr-o-kamāñ hai aaj bhī

'darshan'-e-tishna-kām par ek nigāh sāqiyā

sho.ala-bayāñ ye kal bhī thā sho.ala-bayāñ hai aaj bhī

raaz-e-nihan thi zindagi raaz-e-nihan hai aaj bhi

wahm-o-guman mein thi wahm-o-guman hai aaj bhi

kal bhi nawa-e-agahi qimat-e-sang-o-KHisht thi

naghma-e-amn-o-ashti jins-e-giran hai aaj bhi

dil se to roz-o-shab hui lakh tarah ki guftugu

tishna-e-guftugu magar apni zaban hai aaj bhi

KHak mein jazb ho gaya tere shahid ka lahu

matla-e-kaenat par surKH dhuan hai aaj bhi

ishq ko nind aa gai waqt pe os paD gai

apne junun ke dasht mein dhup jawan hai aaj bhi

waqt ki dastaras nahin bazm-e-gah-e-KHayal tak

ruKH pe ghubar hi sahi yaad jawan hai aaj bhi

kal bhi ruKH-e-hayat par rang-e-shaguftagi na tha

subh-e-bahaar-e-zindagi sham-e-KHizan hai aaj bhi

kal bhi zaban-o-nutq ko KHauf-e-sinan-e-saif tha

naqd-o-nazar ko dahshat-e-tir-o-kaman hai aaj bhi

'darshan'-e-tishna-kaam par ek nigah saqiya

shoala-bayan ye kal bhi tha shoala-bayan hai aaj bhi