raaz-e-ulfat ki jo duniya ko KHabar ho jaegi

rāz-e-ulfat kī jo duniyā ko ḳhabar ho jā.egī

zindagī dushvār se dushvār-tar ho jā.egī

ehtiyāt-e-shauq-o-zabt-e-ārzū ke bāvajūd

mujh pe jo guzregī un ko bhī ḳhabar ho jā.egī

aap ke dāman se vābasta hai merī zindagī

aap jis aalam meñ chāheñge basar ho jā.egī

maiñ samajhtā huuñ dil-e-ġham-dīda-e-anjām ko

aap ke hañste hī merī aañkh tar ho jā.egī

kaun merī sī kahegā vāqi.a yūñhī sahī

saarī duniyā vo jidhar hoñge udhar ho jā.egī

shikva to kartā magar nīchī nazar kā kyā javāb

aah lab tak aate aate be-asar ho jā.egī

dil baġhair-e-dīd-e-jānāñ qatra-e-sīmāb hai

ik balā aise meñ tā.īd-e-nazar ho jā.egī

dil kī betābi tirā rang-e-taġhāful dekh kar

kaun kahtā thā ki apnī bhī basar ho jā.egī

ab mirī jānib nazar hai jab maiñ dekhūñgā udhar

vo nazar ghabrā ke sarf-e-bām-o-dar ho jā.egī

aap 'naḳhshab' iztirāb-e-dil se kyoñ ghabrā ga.e

rafta-rafta ye kaḌī manzil bhī sar ho jā.egī

raaz-e-ulfat ki jo duniya ko KHabar ho jaegi

zindagi dushwar se dushwar-tar ho jaegi

ehtiyat-e-shauq-o-zabt-e-arzu ke bawajud

mujh pe jo guzregi un ko bhi KHabar ho jaegi

aap ke daman se wabasta hai meri zindagi

aap jis aalam mein chahenge basar ho jaegi

main samajhta hun dil-e-gham-dida-e-anjam ko

aap ke hanste hi meri aankh tar ho jaegi

kaun meri si kahega waqia yunhi sahi

sari duniya wo jidhar honge udhar ho jaegi

shikwa to karta magar nichi nazar ka kya jawab

aah lab tak aate aate be-asar ho jaegi

dil baghair-e-did-e-jaanan qatra-e-simab hai

ek bala aise mein taid-e-nazar ho jaegi

dil ki betabi tera rang-e-taghaful dekh kar

kaun kahta tha ki apni bhi basar ho jaegi

ab meri jaanib nazar hai jab main dekhunga udhar

wo nazar ghabra ke sarf-e-baam-o-dar ho jaegi

aap 'naKHshab' iztirab-e-dil se kyon ghabra gae

rafta-rafta ye kaDi manzil bhi sar ho jaegi