raaz-e-ulfat ko chhupaya hai jafa-ju humne

rāz-e-ulfat ko chhupāyā hai jafā-jū ham ne

har sitam par jo piye ḳhuun ke aañsū ham ne

bāl-o-par ġhaur se sayyād ne dekhe baḌh kar

jab hilā.e haiñ qafas meñ kabhī baazū ham ne

parda-e-abr-e-siyah jaise mah-e-tābāñ par

tere 'āriz pe yūñhī dekhe haiñ gesū ham ne

ek pahlū bhī shab-e-ġham ne na badlā afsos

ho ke betāb bahut badle haiñ pahlū ham ne

baḌh ke ḳhud tū ne safīne kiye nazr-e-tūfāñ

nāḳhudā aisī bhī dekhī hai tirī ḳhū ham ne

bazm meñ tujh ko na paayā to ba-ādāb-e-vafā

DhūñDhā duzdīda-nigāhī se har ik sū ham ne

jur.at-e-arz-e-tamannā kabhī raas aa na sakī

dil pe paayā na tire sāmne qaabū ham ne

jis pe paḌ jaa.eñ vo ā.īna-e-hairat ban jaa.e

dekhā hai un kī nigāhoñ kā ye jaadū ham ne

be-adab kah ke unhoñ ne hameñ Tokā 'ishrat'

pyaar meñ kah diyā jab tum ke 'evaz tū ham ne

raaz-e-ulfat ko chhupaya hai jafa-ju hum ne

har sitam par jo piye KHun ke aansu hum ne

baal-o-par ghaur se sayyaad ne dekhe baDh kar

jab hilae hain qafas mein kabhi bazu hum ne

parda-e-abr-e-siyah jaise mah-e-taban par

tere 'ariz pe yunhi dekhe hain gesu hum ne

ek pahlu bhi shab-e-gham ne na badla afsos

ho ke betab bahut badle hain pahlu hum ne

baDh ke KHud tu ne safine kiye nazr-e-tufan

naKHuda aisi bhi dekhi hai teri KHu hum ne

bazm mein tujh ko na paya to ba-adab-e-wafa

DhunDha duzdida-nigahi se har ek su hum ne

jurat-e-arz-e-tamanna kabhi ras aa na saki

dil pe paya na tere samne qabu hum ne

jis pe paD jaen wo aaina-e-hairat ban jae

dekha hai un ki nigahon ka ye jadu hum ne

be-adab kah ke unhon ne hamein Toka 'ishrat'

pyar mein kah diya jab tum ke 'ewaz tu hum ne