raaz khul jae na saqi kahin maiKHane ka

raaz khul jaa.e na saaqī kahīñ maiḳhāne kā

zikr achchhā nahīñ paimāne se paimāne kā

kyā Thikānā hai bhalā aap ke dīvāne kā

zindagī jis ke liye naam hai mar jaane kā

shahr meñ tere maiñ phirtā huuñ yuuñ maarā maarā

jaise ik ajnabī bhaTkā huā vīrāne kā

baat to jab hai ki palkoñ se bhī iz.hār na ho

dil meñ mastūr rahe raaz sanam-ḳhāne kā

jaan de denā bharī bazm meñ āsān nahīñ

sham.a par miTnā hī maqdūr hai parvāne kā

ek lamhe meñ badal jaa.e gulistāñ kā nizām

ham ulaT deñ jo varaq ishq ke afsāne kā

'dard' ke dard ko taskīn mayassar ho jaa.e

ḳhat jo mil jaa.e kabhī aap ke aa jaane kā

raaz khul jae na saqi kahin maiKHane ka

zikr achchha nahin paimane se paimane ka

kya Thikana hai bhala aap ke diwane ka

zindagi jis ke liye nam hai mar jaane ka

shahr mein tere main phirta hun yun mara mara

jaise ek ajnabi bhaTka hua virane ka

baat to jab hai ki palkon se bhi izhaar na ho

dil mein mastur rahe raaz sanam-KHane ka

jaan de dena bhari bazm mein aasan nahin

shama par miTna hi maqdur hai parwane ka

ek lamhe mein badal jae gulistan ka nizam

hum ulaT den jo waraq ishq ke afsane ka

'dard' ke dard ko taskin mayassar ho jae

KHat jo mil jae kabhi aap ke aa jaane ka