raaz ubal paDe aaKHir aasman ke sinon se

raaz ubal paḌe āḳhir āsmāñ ke sīnoñ se

rabt is zamīñ ko hai aur bhī zamīnoñ se

kaun sā jahāñ hai ye kaise log haiñ is meñ

uThtā hai dhuāñ har dam dil ke ābgīnoñ se

har bashar hai fariyādī har taraf añdherā hai

mehr-o-mah nahīñ nikle shahr meñ mahīnoñ se

ik taraf zabānoñ par dostī ke na.are haiñ

ik taraf Tapaktā hai ḳhuun āstīnoñ se

muflisoñ kī bastī meñ vus.ateñ haiñ duniyā kī

aap utar ke dekheñ to apnī shah-nashīnoñ se

nā-ḳhudā kī himmat kā imtihān letī hai

varna kad nahīñ kuchh bhī mauj kī safīnoñ se

tajraboñ kī duniyā meñ ahl-e-ilm-o-hikmat ko

rif.ateñ milīñ 'farhat' fikr-o-fan ke zīnoñ se

raaz ubal paDe aaKHir aasman ke sinon se

rabt is zamin ko hai aur bhi zaminon se

kaun sa jahan hai ye kaise log hain is mein

uThta hai dhuan har dam dil ke aabginon se

har bashar hai fariyaadi har taraf andhera hai

mehr-o-mah nahin nikle shahr mein mahinon se

ek taraf zabanon par dosti ke nare hain

ek taraf Tapakta hai KHun aastinon se

muflison ki basti mein wusaten hain duniya ki

aap utar ke dekhen to apni shah-nashinon se

na-KHuda ki himmat ka imtihan leti hai

warna kad nahin kuchh bhi mauj ki safinon se

tajrabon ki duniya mein ahl-e-ilm-o-hikmat ko

rifaten milin 'farhat' fikr-o-fan ke zinon se