rab ne ata kiye hain muqaddar alag alag

rab ne atā kiye haiñ muqaddar alag alag

hote haiñ shohratoñ ke bhī manzar alag alag

māyūs vo bhī aur pareshān maiñ bhī huuñ

khaa.ī bichhaḌ ke choT diloñ par alag alag

ik ghar ko apne ḳhuun se sīñchā thā baap ne

beTe ne pal meñ kar diye do ghar alag alag

do log banñā chāhte the mīr-e-kārvāñ

donoñ kī zid pe ho ga.e lashkar alag alag

shabnam bane hue kabhī sho.ala bane hue

ashkoñ ke bhī mizāj haiñ ruḳh par alag alag

zaḳhmī kiyā gayā mujhe lafzoñ ke vaar se

hote haiñ dostoñ ke bhī ḳhanjar alag alag

har koī kar rahā hai numā.ish vajūd kī

dariyā alag alag to samundar alag alag

andāz sirf terā nahīñ munfarid 'hilāl'

saare suḳhnavaroñ ke haiñ tevar alag alag

rab ne ata kiye hain muqaddar alag alag

hote hain shohraton ke bhi manzar alag alag

mayus wo bhi aur pareshan main bhi hun

khai bichhaD ke choT dilon par alag alag

ek ghar ko apne KHun se sincha tha bap ne

beTe ne pal mein kar diye do ghar alag alag

do log banna chahte the mir-e-karwan

donon ki zid pe ho gae lashkar alag alag

shabnam bane hue kabhi shoala bane hue

ashkon ke bhi mizaj hain ruKH par alag alag

zaKHmi kiya gaya mujhe lafzon ke war se

hote hain doston ke bhi KHanjar alag alag

har koi kar raha hai numaish wajud ki

dariya alag alag to samundar alag alag

andaz sirf tera nahin munfarid 'hilal'

sare suKHnawaron ke hain tewar alag alag