rabt-e-husn-o-ishq azal se sachcha ye afsana hai

rabt-e-husn-o-ishq azal se sachchā ye afsāna hai

sham.a hai jis mahfil meñ raushan dekho vahīñ parvāna hai

dil ke sivā kuchh paas nahīñ hai dil terā nazrāna hai

yaad tirī rahne ko hamesha hāzir ye kāshāna hai

us kā chehra sūraj aisā us kā ġham sūraj kī tapish

chāñd use kis tarah se kahiye chāñd to ik vīrāna hai

paas thā jab tū kitnī umañgeñ is dil meñ ābād rahīñ

jab se huā hai mujh se judā tū dil ye nahīñ vīrāna hai

ġhairoñ kā ham shikva kareñ kyoñ apnoñ ne jab dī hai daġhā

jis dil ko samjhe the apnā aaj vahī begāna hai

dil kā lahū ye aañsū ban ke aañkh se Tap Tap girne lagā

samjho use paanī kā na qatra ashk nahīñ durdāna hai

sun ke mirī rūdād-e-ġhamgīñ hañs kar bolā vo zālim

lākhoñ sune haiñ aise qisse ye bhī ik afsāna hai

baiThe rahe sab aire-ġhaire ġhair thā ik maiñ hī jaise

mujh ko uThāyā bazm se us ne kah ke ye dīvāna hai

badlī hai gulshan kī havā kyoñ bigḌā mizāj-e-bulbul kyoñ

anjuman-e-gul hai abtar kyoñ sabza kyoñ begāna hai

apne qadah kī ḳhair manā kar mai-kash apnī raah lage

rind-e-ḳharābātī ke dam se ābād ab mai-ḳhāna hai

tū ho salāmat dam rahe terā mai-kade meñ hai shor 'fazā'

aaya aaya saaqī merā gardish meñ paimāna hai

rabt-e-husn-o-ishq azal se sachcha ye afsana hai

shama hai jis mahfil mein raushan dekho wahin parwana hai

dil ke siwa kuchh pas nahin hai dil tera nazrana hai

yaad teri rahne ko hamesha hazir ye kashana hai

us ka chehra suraj aisa us ka gham suraj ki tapish

chand use kis tarah se kahiye chand to ek virana hai

pas tha jab tu kitni umangen is dil mein aabaad rahin

jab se hua hai mujh se juda tu dil ye nahin virana hai

ghairon ka hum shikwa karen kyon apnon ne jab di hai dagha

jis dil ko samjhe the apna aaj wahi begana hai

dil ka lahu ye aansu ban ke aankh se Tap Tap girne laga

samjho use pani ka na qatra ashk nahin durdana hai

sun ke meri rudad-e-ghamgin hans kar bola wo zalim

lakhon sune hain aise qisse ye bhi ek afsana hai

baiThe rahe sab aire-ghaire ghair tha ek main hi jaise

mujh ko uThaya bazm se us ne kah ke ye diwana hai

badli hai gulshan ki hawa kyon bigDa mizaj-e-bulbul kyon

anjuman-e-gul hai abtar kyon sabza kyon begana hai

apne qadah ki KHair mana kar mai-kash apni rah lage

rind-e-KHarabaati ke dam se aabaad ab mai-KHana hai

tu ho salamat dam rahe tera mai-kade mein hai shor 'faza'

aaya aaya saqi mera gardish mein paimana hai