rabt sahra se arsh ka dekha

rabt sahrā se arsh kā dekhā

bādaloñ kā jo qāfila dekhā

kahkashāñ kā vo aks hī to thā

maiñ ne lahroñ meñ rāsta dekhā

Daalī Daalī pe baiTh kar maiñ ne

phal chakhā aur zā.iqa dekhā

charḳh kā pairahan to mailā thā

dahr kā pairahan nayā dekhā

itnā hī qurb kā huā ehsās

jitnā mābain fāsla dekhā

jā.eza jab liyā bulandī kā

sheb se us kā vāsta dekhā

yuuñ lagā har javāñ muammar hai

us ke hāthoñ meñ jo asā dekhā

vo to bagule kā ham-navā hogā

jis ko maiñ Taañg par khaḌā dekhā

be-karāñ is liye huā sāgar

us ne sāhil ko jo ḳhafā dekhā

kyā gagan arz kī kashish meñ thā

us ko jo ḳhaak se aTā dekhā

mīr-e-maidāñ kī to hai baat alag

kyā mirā ran meñ hausla dekhā

sar judā thā sharīr se jaise

maiñ ne bas peḌ kā tanā dekhā

har tarah us kā ehtirām kiyā

jis ko apne se kuchh baḌā dekhā

tū to maidān kā makīñ thā 'figār'

kab pahāḌoñ kā silsila dekhā

rabt sahra se arsh ka dekha

baadalon ka jo qafila dekha

kahkashan ka wo aks hi to tha

main ne lahron mein rasta dekha

Dali Dali pe baiTh kar main ne

phal chakha aur zaiqa dekha

charKH ka pairahan to maila tha

dahr ka pairahan naya dekha

itna hi qurb ka hua ehsas

jitna mabain fasla dekha

jaeza jab liya bulandi ka

sheb se us ka wasta dekha

yun laga har jawan muammar hai

us ke hathon mein jo asa dekha

wo to bagule ka ham-nawa hoga

jis ko main Tang par khaDa dekha

be-karan is liye hua sagar

us ne sahil ko jo KHafa dekha

kya gagan arz ki kashish mein tha

us ko jo KHak se aTa dekha

mir-e-maidan ki to hai baat alag

kya mera ran mein hausla dekha

sar juda tha sharir se jaise

main ne bas peD ka tana dekha

har tarah us ka ehtiram kiya

jis ko apne se kuchh baDa dekha

tu to maidan ka makin tha 'figar'

kab pahaDon ka silsila dekha