rafta-rafta ishq ko KHud-agahi hone lagi

rafta-rafta ishq ko ḳhud-āgahī hone lagī

duur kuchh barham-mizājī husn kī hone lagī

allah allah girya-e-shabnam pe bhī haiñ ḳhanda-zan

bār-e-ḳhātir mujh ko phūloñ kī hañsī hone lagī

dar-haqīqat ye mire zauq-e-nazar kā faiz hai

husn kī duniyā meñ paidā dil-kashī hone lagī

shaiḳh jab ishq-e-butāñ meñ ho ga.e nā-kāmyāb

imtihānan phir ḳhudā kī bandagī hone lagī

un ke kūche meñ bhī jaanā mujh ko āsāñ ho gayā

pardā-posh-e-ārzū dīvāngī hone lagī

jor se kuchh kam nahīñ un kī karam-farmā.iyāñ

barsar-e-bāzār ham se dil-lagī hone lagī

āshiyāñ kī ḳhair ho yā-rab ye kyā andher hai

shab ko gulshan kī taraf kyoñ raushnī hone lagī

faiz 'sāhir' jāniye is ko janāb-e-'josh' kā

ab hamārī shā.erī bhī sāhirī hone lagī

rafta-rafta ishq ko KHud-agahi hone lagi

dur kuchh barham-mizaji husn ki hone lagi

allah allah girya-e-shabnam pe bhi hain KHanda-zan

bar-e-KHatir mujh ko phulon ki hansi hone lagi

dar-haqiqat ye mere zauq-e-nazar ka faiz hai

husn ki duniya mein paida dil-kashi hone lagi

shaiKH jab ishq-e-butan mein ho gae na-kaamyab

imtihanan phir KHuda ki bandagi hone lagi

un ke kuche mein bhi jaana mujh ko aasan ho gaya

parda-posh-e-arzu diwangi hone lagi

jor se kuchh kam nahin un ki karam-farmaiyan

barsar-e-bazar hum se dil-lagi hone lagi

aashiyan ki KHair ho ya-rab ye kya andher hai

shab ko gulshan ki taraf kyon raushni hone lagi

faiz 'sahir' jaaniye is ko janab-e-'josh' ka

ab hamari shaeri bhi sahiri hone lagi