rafta rafta KHwahishon ko muKHtasar karte rahe

rafta rafta ḳhvāhishoñ ko muḳhtasar karte rahe

rafta rafta zindagī ko mo'atabar karte rahe

ik ḳhatā to umr bhar ham jaan kar karte rahe

fāsle baḌhte ga.e phir bhī safar karte rahe

ḳhud-farebī dekhiye sham.eñ bujhā kar raat meñ

ham ujāloñ kī tamanna tā-sahar karte rahe

ham-safar jā pahuñche kab ke manzil-e-maqsūd par

ham-ḳhayāloñ meñ talāsh-e-rahguzar karte rahe

vo bhī kuchh masrūf thā ai dost kār-e-zīst meñ

ham bhī apnī ḳhvāhishoñ ko darguzar karte rahe

purze purze karke us ne yuuñ diyā ḳhat kā javāb

muddatoñ tak us kā mātam nāma-bar karte rahe

chārāgar to kuchh ilāj-e-dil na kar paa.e 'suhaib'

ham marīz-e-dil ilāj-e-chārāgar karte rahe

rafta rafta KHwahishon ko muKHtasar karte rahe

rafta rafta zindagi ko mo'atabar karte rahe

ek KHata to umr bhar hum jaan kar karte rahe

fasle baDhte gae phir bhi safar karte rahe

KHud-farebi dekhiye shamen bujha kar raat mein

hum ujalon ki tamanna ta-sahar karte rahe

ham-safar ja pahunche kab ke manzil-e-maqsud par

ham-KHayalon mein talash-e-rahguzar karte rahe

wo bhi kuchh masruf tha ai dost kar-e-zist mein

hum bhi apni KHwahishon ko darguzar karte rahe

purze purze karke us ne yun diya KHat ka jawab

muddaton tak us ka matam nama-bar karte rahe

chaaragar to kuchh ilaj-e-dil na kar pae 'suhaib'

hum mariz-e-dil ilaj-e-chaaragar karte rahe