raftar raushni ki musaKHKHar na kar sake

raftār raushnī kī musaḳhḳhar na kar sake

saa.e ko apne qad ke barābar na kar sake

jismoñ pe shaḳhsiyat kī taheñ jam ke rah ga.iiñ

ḳhud ko ham apnī zaat se bāhar na kar sake

māhaul kī giraft bhī kis darja saḳht thī

apnī salāhiyat ham ujāgar na kar sake

thā iztirāb dil kā kuchh aisā mo.āmla

ham intizār-e-jalva-e-mahshar na kar sake

sūraj kī raushnī ko muqayyad to kar liyā

dil kā siyāh-ḳhāna munavvar na kar sake

jazbāt garche sher ke qālib meñ Dhal ga.e

lafzoñ ke uuñch niich barābar na kar sake

ham aane vaalī nasl se sharminda haiñ 'asar'

insāniyat kā naam ujāgar na kar sake

raftar raushni ki musaKHKHar na kar sake

sae ko apne qad ke barabar na kar sake

jismon pe shaKHsiyat ki tahen jam ke rah gain

KHud ko hum apni zat se bahar na kar sake

mahaul ki giraft bhi kis darja saKHt thi

apni salahiyat hum ujagar na kar sake

tha iztirab dil ka kuchh aisa moamla

hum intizar-e-jalwa-e-mahshar na kar sake

suraj ki raushni ko muqayyad to kar liya

dil ka siyah-KHana munawwar na kar sake

jazbaat garche sher ke qalib mein Dhal gae

lafzon ke unch nich barabar na kar sake

hum aane wali nasl se sharminda hain 'asar'

insaniyat ka nam ujagar na kar sake