rag-e-jaan se lipaT kar sina-e-bismil mein rahta hai

rag-e-jāñ se lipaT kar sīna-e-bismil meñ rahtā hai

vo but chehra sahī lekin hamāre dil meñ rahtā hai

baratne kā salīqa ho agar to baat hai bantī

zabāñ kā husn to alfāz kī jhilmil meñ rahtā hai

sazā kā ḳhauf to gumrāh kar detā hai munsif ko

hamārā ḳhuun nāhaq dīda-e-qātil meñ rahtā hai

hamārī aañkh meñ rahtā hai us kā husn kuchh aise

koī māshūq jaise parda-e-mahmil meñ rahtā hai

rukāvaT kyoñ bane āzād qaumoñ kī taraqqī meñ

vo ik andesha jo hālāt-e-mustaqbil meñ rahtā hai

musāfir jis ko apne azm kā ehsās ho jaa.e

kabhī raste meñ rahtā hai kabhī manzil meñ rahtā hai

rag-e-jaan se lipaT kar sina-e-bismil mein rahta hai

wo but chehra sahi lekin hamare dil mein rahta hai

baratne ka saliqa ho agar to baat hai banti

zaban ka husn to alfaz ki jhilmil mein rahta hai

saza ka KHauf to gumrah kar deta hai munsif ko

hamara KHun nahaq dida-e-qatil mein rahta hai

hamari aankh mein rahta hai us ka husn kuchh aise

koi mashuq jaise parda-e-mahmil mein rahta hai

rukawaT kyon bane aazad qaumon ki taraqqi mein

wo ek andesha jo haalat-e-mustaqbil mein rahta hai

musafir jis ko apne azm ka ehsas ho jae

kabhi raste mein rahta hai kabhi manzil mein rahta hai