rag rag mein zahr phaila hua tishnagi ka tha

rag rag meñ zahr phailā huā tishnagī kā thā

sahrā kī dhuup thī ki safar zindagī kā thā

tārīkiyoñ kī tah meñ utartā chalā gayā

kuchh is qadar Darā huā dil raushnī kā thā

hone ke bāvajūd ham is bazm meñ na the

ehsās agar thā koī to apnī kamī kā thā

nādāniyāñ thiiñ us se jo kī thiiñ tavaqquāt

ḳhush-fahmiyāñ thiiñ varna kahāñ vo kisī kā thā

sub.heñ thiiñ gard gard to shāmeñ dhuāñ dhuāñ

ham jis jagah the qaht vahāñ raushnī kā thā

tashvīsh thī to baḌhtī huī bandishoñ pe thī

ehsās thā shadīd to āvārgī kā thā

'muztar' mizāj alag the magar us ke bāvajūd

rishta zarūr dhuup se kuchh chāñdnī kā thā

rag rag mein zahr phaila hua tishnagi ka tha

sahra ki dhup thi ki safar zindagi ka tha

tarikiyon ki tah mein utarta chala gaya

kuchh is qadar Dara hua dil raushni ka tha

hone ke bawajud hum is bazm mein na the

ehsas agar tha koi to apni kami ka tha

nadaniyan thin us se jo ki thin tawaqquat

KHush-fahmiyan thin warna kahan wo kisi ka tha

subhen thin gard gard to shamen dhuan dhuan

hum jis jagah the qaht wahan raushni ka tha

tashwish thi to baDhti hui bandishon pe thi

ehsas tha shadid to aawargi ka tha

'muztar' mizaj alag the magar us ke bawajud

rishta zarur dhup se kuchh chandni ka tha