raghbat hai jinko wasl ki tere wajud se

raġhbat hai jin ko vasl kī tere vajūd se

tahlīl ho rahe haiñ fazāoñ meñ duud se

markaz banā huuñ dīda-e-arabāb-e-ġhaib kā

laayā gayā hai mujh ko jahān-e-shuhūd se

kāfir batā ke qatl unheñ kar diyā gayā

mar.ūb ho sake jo na dāġh-e-sujūd se

kamre meñ aa ke baiThā huuñ apne bujhā bujhā

jal jal ke terī mahfil-e-raqs-o-surūd se

ik ek naqsh ubhār duuñ tere jamāl kā

aage nikal ke fikr kī saarī quyūd se

vahshat meñ noch khā.ūñ na 'zīshān' ḳhud ko maiñ

chal duur mujh ko le ke tū merī hudūd se

raghbat hai jin ko wasl ki tere wajud se

tahlil ho rahe hain fazaon mein dud se

markaz bana hun dida-e-arabab-e-ghaib ka

laya gaya hai mujh ko jahan-e-shuhud se

kafir bata ke qatl unhen kar diya gaya

marub ho sake jo na dagh-e-sujud se

kamre mein aa ke baiTha hun apne bujha bujha

jal jal ke teri mahfil-e-raqs-o-surud se

ek ek naqsh ubhaar dun tere jamal ka

aage nikal ke fikr ki sari quyud se

wahshat mein noch khaun na 'zishan' KHud ko main

chal dur mujh ko le ke tu meri hudud se