rah-e-gham mein zikr un ka mera KHas ham-safar tha

rah-e-ġham meñ zikr un kā mirā ḳhaas ham-safar thā

ġharaz un ke hī karam se safar apnā muḳhtasar thā

ye sarisht thī jabīñ kī ise tum muaaf kar do

na ḳhayāl-e-dard-e-sar thā na ḳhayāl-e-sang-e-dar thā

ġham-e-dil surūr ban kar mirī zindagī pe chhāyā

ġham-e-dil kī ḳhush-mazāqī se maiñ kitnā bā-ḳhabar thā

mire dostoñ ne jāñchā hai mirī suḳhan-varī ko

na maiñ sāhaib-e-hunar thā na maiñ ḳhādim-e-hunar thā

kabhī zulmatoñ kā shaidā kabhī nuur kā thā joyā

kabhī shab-parast thā maiñ kabhī kushta-e-sahar thā

na.ī manziloñ ke raste mire paaoñ chhū rahe haiñ

maiñ harīf-e-rahguzar huuñ maiñ harīf-e-rahguzar thā

baḌī muddatoñ meñ aa kar ye khulā hai mujh pe 'fitrat'

ki bayān-e-ġham kī ḳhātir maiñ zabān-e-chashm-e-tar thā

rah-e-gham mein zikr un ka mera KHas ham-safar tha

gharaz un ke hi karam se safar apna muKHtasar tha

ye sarisht thi jabin ki ise tum muaf kar do

na KHayal-e-dard-e-sar tha na KHayal-e-sang-e-dar tha

gham-e-dil surur ban kar meri zindagi pe chhaya

gham-e-dil ki KHush-mazaqi se main kitna ba-KHabar tha

mere doston ne jaancha hai meri suKHan-wari ko

na main sahaib-e-hunar tha na main KHadim-e-hunar tha

kabhi zulmaton ka shaida kabhi nur ka tha joya

kabhi shab-parast tha main kabhi kushta-e-sahar tha

nai manzilon ke raste mere paon chhu rahe hain

main harif-e-rahguzar hun main harif-e-rahguzar tha

baDi muddaton mein aa kar ye khula hai mujh pe 'fitrat'

ki bayan-e-gham ki KHatir main zaban-e-chashm-e-tar tha