rah-e-hayat mein chahat ko zindagani likh

rah-e-hayāt meñ chāhat ko zindagānī likh

fasāne chhoḌ ke sachchī sī ik kahānī likh

husūl-e-daulat-o-shohrat meñ mubtalā hai tū

husūl-e-daulat-o-shohrat ko zahar-ḳhvānī likh

suḳhan-varoñ ke qabīle kī tarjumānī kar

kalām-e-‘ishq ko valiyoñ kī rājdhānī likh

jo baḌh ke aap sitāroñ pe Dālte haiñ kamand

diloñ pe aise hī logoñ kī hukmrānī likh

mujhe batā ki kabhī 'ishq bhī kiyā tū ne

milā hai pyaar to qudrat kī mehrbānī likh

jo ashk ban ke mire dil kī aañkh se Tapkā

use sitāra samajh harf-e-āsmānī likh

fareb-kārī to ab 'aam ho ga.ī 'bāsit'

tū haq-shanās hai haq ko hī kāmrānī likh

rah-e-hayat mein chahat ko zindagani likh

fasane chhoD ke sachchi si ek kahani likh

husul-e-daulat-o-shohrat mein mubtala hai tu

husul-e-daulat-o-shohrat ko zahar-KHwani likh

suKHan-waron ke qabile ki tarjumani kar

kalam-e-‘ishq ko waliyon ki rajdhani likh

jo baDh ke aap sitaron pe Dalte hain kamand

dilon pe aise hi logon ki hukmrani likh

mujhe bata ki kabhi 'ishq bhi kiya tu ne

mila hai pyar to qudrat ki mehrbani likh

jo ashk ban ke mere dil ki aankh se Tapka

use sitara samajh harf-e-asmani likh

fareb-kari to ab 'am ho gai 'basit'

tu haq-shanas hai haq ko hi kaamrani likh