rah-e-jafa ki nishani mein likh diya tujhko

rah-e-jafā kī nishānī meñ likh diyā tujh ko

ki apnī zinda kahānī meñ likh diyā tujh ko

kitāb-e-yād-e-nihānī meñ likh diyā tujh ko

vafā ne yūsuf-e-sānī meñ likh diyā tujh ko

ḳhamoshiyoñ se nahīñ naam likh sakī terā

to ab ke sho.ala-bayānī meñ likh diyā tujh ko

ye uñgliyāñ to use roktī rahīñ lekin

qalam ne zor-e-bayānī meñ likh diyā tujh ko

zabān chup thī ki thā pās-e-hurmat-e-ulfat

to dil ne chashm ke paanī meñ likh diyā tujh ko

vafūr-e-jazb ke aage na koī pesh chalī

taḌaptī yaad purānī meñ likh diyā tujh ko

uḌā ke laa.ī sabā terī ḳhushbueñ aise

ki maiñ ne raat kī raanī meñ likh diyā tujh ko

matā-e-dard ne uksāyā is tarah se 'nasīm'

ki maiñ ne zulm ke baanī meñ likh diyā tujh ko

rah-e-jafa ki nishani mein likh diya tujh ko

ki apni zinda kahani mein likh diya tujh ko

kitab-e-yaad-e-nihani mein likh diya tujh ko

wafa ne yusuf-e-sani mein likh diya tujh ko

KHamoshiyon se nahin nam likh saki tera

to ab ke shoala-bayani mein likh diya tujh ko

ye ungliyan to use rokti rahin lekin

qalam ne zor-e-bayani mein likh diya tujh ko

zaban chup thi ki tha pas-e-hurmat-e-ulfat

to dil ne chashm ke pani mein likh diya tujh ko

wafur-e-jazb ke aage na koi pesh chali

taDapti yaad purani mein likh diya tujh ko

uDa ke lai saba teri KHushbuen aise

ki main ne raat ki rani mein likh diya tujh ko

mata-e-dard ne uksaya is tarah se 'nasim'

ki main ne zulm ke bani mein likh diya tujh ko