rah-e-junun mein chala yun main umr-bhar tanha

rah-e-junūñ meñ chalā yuuñ maiñ umr-bhar tanhā

ki jaise koī bagūlā kare safar tanhā

udāsī ruuh se guzrī hai is tarah jaise

ujaaḌ dasht meñ patjhaḌ kī dopahar tanhā

bhaTak rahī hai ḳhalāoñ meñ yuuñ nazar jaise

ho raat meñ kisī gumrāh kā guzar tanhā

guzar ga.e jaras-e-gul ke qāfile kab ke

takā kare yūñhī ab gard-e-rah-guzar tanhā

nasīm-e-sub.h mujhe bhī gale lagātī jā

maiñ vo diyā huuñ jalā hai jo rāt-bhar tanhā

nazar meñ thī bhare bāzār kī sī vīrānī

hujūm meñ bhī rahe ham nagar nagar tanhā

añdherī raat havā saḳht tez vahshat-e-dil

ham aisī shab meñ bhī phirte haiñ dar-ba-dar tanhā

musāfiroñ pe 'musavvir' na jaane kyā biitī

safīna aayā hai sāhil pe lauT kar tanhā

rah-e-junun mein chala yun main umr-bhar tanha

ki jaise koi bagula kare safar tanha

udasi ruh se guzri hai is tarah jaise

ujaD dasht mein patjhaD ki dopahar tanha

bhaTak rahi hai KHalaon mein yun nazar jaise

ho raat mein kisi gumrah ka guzar tanha

guzar gae jaras-e-gul ke qafile kab ke

taka kare yunhi ab gard-e-rah-guzar tanha

nasim-e-subh mujhe bhi gale lagati ja

main wo diya hun jala hai jo raat-bhar tanha

nazar mein thi bhare bazar ki si virani

hujum mein bhi rahe hum nagar nagar tanha

andheri raat hawa saKHt tez wahshat-e-dil

hum aisi shab mein bhi phirte hain dar-ba-dar tanha

musafiron pe 'musawwir' na jaane kya biti

safina aaya hai sahil pe lauT kar tanha