rah-e-safar mein rahe aur hayat se guzre

rah-e-safar meñ rahe aur hayāt se guzre

ki ek rañg meñ kitne jihāt se guzre

baḌe sukūn se ham ehtiyāt se guzre

qadam jamā ke chale kā.enāt se guzre

hai koī azm-e-javāñ aur na kuchh junūñ-ḳhezī

be-dast-o-pā hī rahe mumkināt se guzre

yaqīn dil meñ rahā terī dilrubā.ī kā

so jaag jaag ke ham saarī raat se guzre

koī natīja kahāñ baat kā nikal paayā

ki ek baat hī kyā baat baat se guzre

taġhayyurāt kī duniyā meñ ham rahe har dam

ki sote jāgte ham bhī hayāt se guzre

kabhī na ḳhud ko kiyā vaqf-e-inhimāk-e-vajūd

'obaid' bach ke rahe hādsāt se guzre

rah-e-safar mein rahe aur hayat se guzre

ki ek rang mein kitne jihat se guzre

baDe sukun se hum ehtiyat se guzre

qadam jama ke chale kaenat se guzre

hai koi azm-e-jawan aur na kuchh junun-KHezi

be-dast-o-pa hi rahe mumkinat se guzre

yaqin dil mein raha teri dilrubai ka

so jag jag ke hum sari raat se guzre

koi natija kahan baat ka nikal paya

ki ek baat hi kya baat baat se guzre

taghayyuraat ki duniya mein hum rahe har dam

ki sote jagte hum bhi hayat se guzre

kabhi na KHud ko kiya waqf-e-inhimak-e-wajud

'obaid' bach ke rahe hadsat se guzre