rah gai hai dil ki dil mein baat afraatafri mein

rah ga.ī hai dil kī dil meñ baat afrātafrī meñ

par lagā kar uḌ ga.e lamhāt afrātafrī meñ

us kī āñkhoñ meñ na jaane kaisā nirmal jaadū thā

kitnī resham ho ga.ī hai zaat afrātafrī meñ

mere chehre par sajā dī khulte rañgoñ kī dhanak

chāhatoñ kī sauñp kar sauġhāt afrātafrī meñ

vo gulāboñ jaisā lahja bāteñ gajroñ se ladī

bas mahakte hī rahe jazbāt afrātafrī meñ

dhaḌkanoñ kī lai pe gintī huuñ unheñ ab baiTh kar

kar gayā hai jo vo ehsānāt afrātafrī meñ

dil kī banjar aur chatiyal sī zamīñ jal-thal huī

TuuT kar barsī thī yuuñ barsāt afrātafrī meñ

vaqt ne lā kar sajā dī kaisī palkoñ par 'suman'

jhilmilāte tāroñ kī bārāt afrātafrī meñ

rah gai hai dil ki dil mein baat afraatafri mein

par laga kar uD gae lamhat afraatafri mein

us ki aankhon mein na jaane kaisa nirmal jadu tha

kitni resham ho gai hai zat afraatafri mein

mere chehre par saja di khulte rangon ki dhanak

chahaton ki saunp kar saughat afraatafri mein

wo gulabon jaisa lahja baaten gajron se ladi

bas mahakte hi rahe jazbaat afraatafri mein

dhaDkanon ki lai pe ginti hun unhen ab baiTh kar

kar gaya hai jo wo ehsanat afraatafri mein

dil ki banjar aur chatiyal si zamin jal-thal hui

TuT kar barsi thi yun barsat afraatafri mein

waqt ne la kar saja di kaisi palkon par 'suman'

jhilmilate taron ki baraat afraatafri mein