rah gaya par wo tere chaak garebanon ka

rah gayā par vo tire chaak garebānoñ kā

hashr meñ koī bhī pursāñ nahīñ dīvānoñ kā

raah chalte huī hai daulat-e-dīdār nasīb

is meñ ehsān nahīñ aap ke darbānoñ kā

yaad aatī haiñ junūñ-ḳhez havā.eñ un kī

ab na vo ham haiñ na aalam vo bayābānoñ kā

are dīvāne zarā chal ke unheñ dekh to le

mai-kadoñ meñ hai mazā shaiḳh parī-ḳhānoñ kā

but ḳhudā huuñ ki na huuñ hai magar itnī tauqīr

but-kada aaj bhī ka.aba hai musalmānoñ kā

chashm-e-sāqī kī tarah hai asar-andāz ai shaiḳh

ba.ad tauba ke chhalaknā bhare paimānoñ kā

chuTkiyāñ aap na leñ mehñdī lage hāthoñ se

kaam deñge na ye nāḳhun kabhī paikānoñ kā

qaht jaa.e bhī magar ye nahīñ jaane ke 'riyāz'

ki mire ghar hai ijāra mire mehmānoñ kā

rah gaya par wo tere chaak garebanon ka

hashr mein koi bhi pursan nahin diwanon ka

rah chalte hui hai daulat-e-didar nasib

is mein ehsan nahin aap ke darbanon ka

yaad aati hain junun-KHez hawaen un ki

ab na wo hum hain na aalam wo bayabanon ka

are diwane zara chal ke unhen dekh to le

mai-kadon mein hai maza shaiKH pari-KHanon ka

but KHuda hun ki na hun hai magar itni tauqir

but-kada aaj bhi kaba hai musalmanon ka

chashm-e-saqi ki tarah hai asar-andaz ai shaiKH

baad tauba ke chhalakna bhare paimanon ka

chuTkiyan aap na len mehndi lage hathon se

kaam denge na ye naKHun kabhi paikanon ka

qaht jae bhi magar ye nahin jaane ke 'riyaz'

ki mere ghar hai ijara mere mehmanon ka