rah ke gulshan mein bhi tarse hain gul-e-tar ke liye

rah ke gulshan meñ bhī tarse haiñ gul-e-tar ke liye

ye muqaddar thā to kyā ro.eñ muqaddar ke liye

dīn-o-duniyā kā bhalā hosh rahegā kis ko

aap pahlū meñ to aa.eñ mire pal bhar ke liye

sirf ik dard-e-mohabbat hī kā ronā to nahīñ

log phirte haiñ pareshān mire sar ke liye

zaat se un kī hai vābasta mirā dil aise

jaise dīvār zarūrī hai kisī dar ke liye

dāġh-e-dil aisā jalā hijr kī rātoñ meñ na pūchh

sham.a is taur na jal pā.egī dam bhar ke liye

tū na aa.e tirā paiġhām hī aa.e to sahī

kuchh to sāmān-e-sukūñ ho dil-e-muztar ke liye

husn zevar kā bhalā 'auj' kahāñ hai muhtāj

ġhāza lāzim to nahīñ hai ruḳh-e-anvar ke liye

rah ke gulshan mein bhi tarse hain gul-e-tar ke liye

ye muqaddar tha to kya roen muqaddar ke liye

din-o-duniya ka bhala hosh rahega kis ko

aap pahlu mein to aaen mere pal bhar ke liye

sirf ek dard-e-mohabbat hi ka rona to nahin

log phirte hain pareshan mere sar ke liye

zat se un ki hai wabasta mera dil aise

jaise diwar zaruri hai kisi dar ke liye

dagh-e-dil aisa jala hijr ki raaton mein na puchh

shama is taur na jal paegi dam bhar ke liye

tu na aae tera paigham hi aae to sahi

kuchh to saman-e-sukun ho dil-e-muztar ke liye

husn zewar ka bhala 'auj' kahan hai muhtaj

ghaza lazim to nahin hai ruKH-e-anwar ke liye