rah-nawardi ka payambar tha magar achchha laga

rah-navardī kā payambar thā magar achchhā lagā

vo hazar vo lamhe bhar kā ham-safar achchhā lagā

mīr-o-ġhālib jis galī the barmalā rusvā hue

us galī chup-chāp sā apnā guzar achchhā lagā

munfarid haiñ zāviye har shā'irī ke dekhiye

sab ko apnī shā'irī kā ye hunar achchhā lagā

rang the kuchh aur bhī lahore ke sab yaad haiñ

par purāne shahr kā būḌhā shajar achchhā lagā

us jahāñ meñ ulfatoñ kī dhuum hogī chār-sū

barmalā ham kah sakeñge ye bashar achchhā lagā

aur bhī achchhe-bhale haiñ bazm meñ 'jogī' magar

terā mujh ko baiThne aanā idhar achchhā lagā

raaz mujh ko bhī nahīñ mā'lūm re jogan batā

tujh ko itnā kyoñ ye 'jogī' dar-ba-dar achchhā lagā

rah-nawardi ka payambar tha magar achchha laga

wo hazar wo lamhe bhar ka ham-safar achchha laga

mir-o-ghaalib jis gali the barmala ruswa hue

us gali chup-chap sa apna guzar achchha laga

munfarid hain zawiye har sha'iri ke dekhiye

sab ko apni sha'iri ka ye hunar achchha laga

rang the kuchh aur bhi lahore ke sab yaad hain

par purane shahr ka buDha shajar achchha laga

us jahan mein ulfaton ki dhum hogi chaar-su

barmala hum kah sakenge ye bashar achchha laga

aur bhi achchhe-bhale hain bazm mein 'jogi' magar

tera mujh ko baiThne aana idhar achchha laga

raaz mujh ko bhi nahin ma'lum re jogan bata

tujh ko itna kyon ye 'jogi' dar-ba-dar achchha laga