raha asir kai sal naqsh-e-pa ki tarah

rahā asiir ka.ī saal naqsh-e-pā kī tarah

ḳhudā kā shukr ab āzād huuñ havā kī tarah

mire habīb mujhe izn-e-bāryābī de

khaḌā huuñ dar pe tire āh-e-nā-rasā kī tarah

gunāhgār huuñ ik maiñ hī shahr meñ shāyad

ki baat karte haiñ sab mujh se pārsā kī tarah

abhī milā nahīñ mujh ko surāġh manzil kā

bhaTak rahā huuñ abhī apne rahnumā kī tarah

kise ḳhabar ki ye jiddat hai yā siyāsat hai

jafā kare bhī to kartā hai vo vafā kī tarah

munāfiqat kā nayā hai ye dil-fareb andāz

mujhe milā mirā dushman bhī āshnā kī tarah

mire zamīr kā ye hukm hai mujhe 'rif.at'

rakhī hai maiñ ne jo is daur meñ vafā kī tarah

raha asir kai sal naqsh-e-pa ki tarah

KHuda ka shukr ab aazad hun hawa ki tarah

mere habib mujhe izn-e-baryabi de

khaDa hun dar pe tere aah-e-na-rasa ki tarah

gunahgar hun ek main hi shahr mein shayad

ki baat karte hain sab mujh se parsa ki tarah

abhi mila nahin mujh ko suragh manzil ka

bhaTak raha hun abhi apne rahnuma ki tarah

kise KHabar ki ye jiddat hai ya siyasat hai

jafa kare bhi to karta hai wo wafa ki tarah

munafiqat ka naya hai ye dil-fareb andaz

mujhe mila mera dushman bhi aashna ki tarah

mere zamir ka ye hukm hai mujhe 'rifat'

rakhi hai main ne jo is daur mein wafa ki tarah