raha jab na imkan zabt-e-fughan ka

rahā jab na imkān zabt-e-fuġhāñ kā

kiyā qasd bedard ne imtihāñ kā

gulistāñ meñ hai daur fasl-e-ḳhizāñ kā

ajab rang hai gardish-e-āsmāñ kā

huā sāmnā āfat-e-nā-gahāñ kā

patā chal gayā barq ko āshiyāñ kā

kaTā hashr kā din gila karte karte

huā ḳhatm qissa na jaur-e-butāñ kā

uThā.eñ kahāñ tak asīr-e-mohabbat

jafā.eñ tumhārī sitam āsmāñ kā

yaqīñ hai ki ahl-e-zamīñ marte marte

na bhūleñge hargiz sitam āsmāñ kā

lagāte haiñ āñkhoñ se ahl-e-basārat

samajhte haiñ rutba tire āstāñ kā

rahe kaan mushtāq bāñg-e-jaras ke

na paayā nishāñ aaj tak kārvāñ kā

khaTakte haiñ āñkhoñ meñ kyoñ chaar tinke

tajassus hai sayyād kyoñ āshiyāñ kā

tire tīra-baḳhtoñ kī aahoñ se zālim

uḌegā dhuāñ ban ke rang āsmāñ kā

sharīk-e-ġham-e-jāñkanī kaun hogā

sahārā faqat hai dil-e-nā-tavāñ kā

qafas kī hifāzat se sayyād hāsil

nikaltā hai dam tā.ir-e-nīm-jāñ kā

pashemāñ gunāhoñ se haiñ all-e-isyāñ

bapā shor mahshar meñ hai al-amāñ kā

baqā dār-e-duniyā ko 'mas.ūd' kai din

yahāñ ḳhaak tālib huuñ nām-o-nishāñ kā

raha jab na imkan zabt-e-fughan ka

kiya qasd bedard ne imtihan ka

gulistan mein hai daur fasl-e-KHizan ka

ajab rang hai gardish-e-asman ka

hua samna aafat-e-na-gahan ka

pata chal gaya barq ko aashiyan ka

kaTa hashr ka din gila karte karte

hua KHatm qissa na jaur-e-butan ka

uThaen kahan tak asir-e-mohabbat

jafaen tumhaari sitam aasman ka

yaqin hai ki ahl-e-zamin marte marte

na bhulenge hargiz sitam aasman ka

lagate hain aankhon se ahl-e-basarat

samajhte hain rutba tere aastan ka

rahe kan mushtaq bang-e-jaras ke

na paya nishan aaj tak karwan ka

khaTakte hain aankhon mein kyon chaar tinke

tajassus hai sayyaad kyon aashiyan ka

tere tira-baKHton ki aahon se zalim

uDega dhuan ban ke rang aasman ka

sharik-e-gham-e-jaankani kaun hoga

sahaara faqat hai dil-e-na-tawan ka

qafas ki hifazat se sayyaad hasil

nikalta hai dam tair-e-nim-jaan ka

pasheman gunahon se hain all-e-isyan

bapa shor mahshar mein hai al-aman ka

baqa dar-e-duniya ko 'masud' kai din

yahan KHak talib hun nam-o-nishan ka