raha karta hai ai dil samna har-dam musibat ka

rahā kartā hai ai dil sāmnā har-dam musībat kā

hazār aafat kī ik aafat hai aa jaanā tabī.at kā

yahī rasm-e-vafā hai aur yahī hāsil mohabbat kā

ki ai dil shukr kiije gar mahal bhī ho shikāyat kā

vo ik tum ho tumhāre muñh meñ jo aatā hai kahte ho

vo ik ham haiñ ki ham ko Dhab nahīñ aatā shikāyat kā

kisī din maut se dast-o-garebāñ karne vaalā hai

mire siine meñ ye rah rah ke uThnā dard-e-furqat kā

nigāheñ phir rahī haiñ ik jahāñ kī bal hai abrū par

sar-e-mahfil chhiḌā ye zikr kis bargashta-qismat kā

tire uThte hī ā.īne kī duniyā ho ga.ī vīrāñ

abhī thā jalva-gar is meñ hasīñ ik terī sūrat kā

sidhāre vo hamāre dafn kā sāmān hotā hai

ajal ke aate hī vaqt aa gayā donoñ kī ruḳhsat kā

kisī kamsin kā ye 'mas.ūd' se dil toḌ kar kahnā

khilaunā dūsrā laao koī is shakl-o-sūrat kā

raha karta hai ai dil samna har-dam musibat ka

hazar aafat ki ek aafat hai aa jaana tabiat ka

yahi rasm-e-wafa hai aur yahi hasil mohabbat ka

ki ai dil shukr kije gar mahal bhi ho shikayat ka

wo ek tum ho tumhaare munh mein jo aata hai kahte ho

wo ek hum hain ki hum ko Dhab nahin aata shikayat ka

kisi din maut se dast-o-gareban karne wala hai

mere sine mein ye rah rah ke uThna dard-e-furqat ka

nigahen phir rahi hain ek jahan ki bal hai abru par

sar-e-mahfil chhiDa ye zikr kis bargashta-qismat ka

tere uThte hi aaine ki duniya ho gai viran

abhi tha jalwa-gar is mein hasin ek teri surat ka

sidhaare wo hamare dafn ka saman hota hai

ajal ke aate hi waqt aa gaya donon ki ruKHsat ka

kisi kamsin ka ye 'masud' se dil toD kar kahna

khilauna dusra lao koi is shakl-o-surat ka