rahbar-e-qaum samajh le ye haqiqat hai baDi

rahbar-e-qaum samajh le ye haqīqat hai baḌī

qaum chhoTī hai magar is kī rivāyat hai baḌī

chādar-o-qāmat-e-fārūq pe rakhte haiñ nazar

ehtisāb un kā kaḌā aur itā.at hai baḌī

rāhbar badlā to phir se safar āġhāz huā

dasht-e-gum-rāh meñ is taur masāfat hai baḌī

kyā idāre the jo TuuTe haiñ anā kī ḳhātir

un kī tafsīl na pūchho ye hikāyat hai baḌī

aaj bhī husn-e-bayāñ parda-e-āmāl banā

aaj ke daur meñ bhī harf kī tāqat hai baḌī

ahl-e-dil terī vafāoñ kī qasam khāte haiñ

bar-sar-e-kū-e-jafā bhī tirī shohrat hai baḌī

dard kī mauj ubhartī hai tire naam ke saath

dūriyāñ laakh sahī pyaar kī qurbat hai baḌī

rahbar-e-qaum samajh le ye haqiqat hai baDi

qaum chhoTi hai magar is ki riwayat hai baDi

chadar-o-qamat-e-faruq pe rakhte hain nazar

ehtisab un ka kaDa aur itaat hai baDi

rahbar badla to phir se safar aaghaz hua

dasht-e-gum-rah mein is taur masafat hai baDi

kya idare the jo TuTe hain ana ki KHatir

un ki tafsil na puchho ye hikayat hai baDi

aaj bhi husn-e-bayan parda-e-amal bana

aaj ke daur mein bhi harf ki taqat hai baDi

ahl-e-dil teri wafaon ki qasam khate hain

bar-sar-e-ku-e-jafa bhi teri shohrat hai baDi

dard ki mauj ubharti hai tere nam ke sath

duriyan lakh sahi pyar ki qurbat hai baDi