rahe asir-e-qafas aashiyan na dekh sake

rahe asīr-e-qafas āshiyāñ na dekh sake

bharī bahār meñ ham gulsitāñ na dekh sake

bas ik jhalak hī ne behosh kar diyā ham ko

tire jamāl kī ra.anā.iyāñ na dekh sake

dil-o-jigar tap-e-furqat meñ jal rahe haiñ magar

kabhī nikaltā huā ham dhuāñ na dekh sake

hameñ to jab se ye zulmat-kada nasīb huā

kabhī ham apnī bhī parchhā.iyāñ na dekh sake

hazār tarah se tadbīr kī dil-e-nāshād

magar kabhī tujhe ham shādmāñ na dekh sake

rah-e-talab meñ rakhe paañv jab se ai 'fayyāz'

junūn-e-shauq meñ sūd-o-ziyāñ na dekh sake

rahe asir-e-qafas aashiyan na dekh sake

bhari bahaar mein hum gulsitan na dekh sake

bas ek jhalak hi ne behosh kar diya hum ko

tere jamal ki ranaiyan na dekh sake

dil-o-jigar tap-e-furqat mein jal rahe hain magar

kabhi nikalta hua hum dhuan na dekh sake

hamein to jab se ye zulmat-kada nasib hua

kabhi hum apni bhi parchhaiyan na dekh sake

hazar tarah se tadbir ki dil-e-nashad

magar kabhi tujhe hum shadman na dekh sake

rah-e-talab mein rakhe panw jab se ai 'fayyaz'

junun-e-shauq mein sud-o-ziyan na dekh sake